Unha muller resultou ferida este venres ao pé da Escola Infantil de Tállara, no termo municipal de Lousame, tras ser arrastrada polo seu propio turismo e precipitarse por un desnivel duns tres metros de altura. O accidente tivo lugar arredor das 13:00 horas, cando a condutora se dispuxo a recoller un alumno do centro.
Segundo a información facilitada polo 112 Galicia, a muller descendeu do vehículo sen ter accionado previamente o freo de man. Ao decatarse de que o turismo empezaba a moverse, tentou poñer o freo, momento no que foi desprazada e arrastrada polo automóbil ata caer polo terraplén.
Alertados polo Centro Integrado de Atención ás Emerxencias de Galicia (CIAE-112), ata o lugar desprazáronse con urxencia os equipos de Urxencias Sanitarias de Galicia-061 para atender a vítima, que presentaba lesións e posibles fracturas pendentes de confirmación médica.
No dispositivo participaron tamén os membros do GES de Noia, aínda que a ferida se atopaba nunha zona totalmente accesible e non foi preciso realizar labores de excarceración nin de rescate complexo. Así mesmo, mobilizouse a Garda Civil de Tráfico para regular a contorna e levantar o ateigado sobre as circunstancias do sinistro.
