O xerente da sociedade Xestión de Solo de Galicia – XESTUR, Diego Toja, afirmou hoxe que a Xunta está “a acelerar os traballos para que a finais de ano poidan estar licitadas as obras de construción do novo polígono de Ribeira (A Coruña) que permitirá atender a demanda de solo industrial existente neste municipio coruñés”, sinalou,
Acompañado pola alcaldesa de Ribeira, María Sampedro, o xerente de XESTUR supervisou o inicio dos traballos para elaborar o proxecto de urbanización e que inclúen a realización dos estudos xeolóxico e xeotécnico. Estes traballos, sinalou, “son necesarios para avanzar no proxecto, xa en fase de licitación, e que está previsto que se adxudique nas vindeiras semanas”.
Con esta actuación, o Goberno galego quere impulsar definitivamente o proxecto, logo de que o pasado mes de xullo a Consellería de Economía e Industria e o Concello de Ribeira asinaran un protocolo de colaboración para actualizar o proxecto de construción do polígono, que finalmente terá unha superficie de 260.000 m2. .
De acordo con este documento, agora o que se vai facer é actualizar, entre outros aspectos, as medicións, as solucións construtivas e as redes de servizo, actuacións que van ser contratadas e financiadas por Xestur e que permitirán avanzar no proxecto de urbanización.
