A conselleira Fabiola García e o alcalde Luís Oujo supervisaron o remate das obras a dous días do comezo do novo curso gratuíto de cero a tres anos.
A escola infantil pública autonómica do Porto do Son ten xa a punto as súas instalacións tras completarse as obras de reforma impulsadas pola Xunta cun orzamento de 50.000 euros. A conselleira de Política Social e Igualdade, Fabiola García, visitou este sábado o centro acompañada polo alcalde da localidade, Luís Oujo, para comprobar o resultado dos traballos antes do reinicio da actividade lectiva.
A intervención, contratada e executada polo propio Concello a través de fondos autonómicos, permitiu instalar un novo sistema de climatización en todo o centro, sumar novos módulos de almacenamento para as aulas, colocar unha cancela de seguridade no vestíbulo de entrada e completar a limpeza e o pintado de todas as fachadas exteriores.
Esta obra forma parte dun programa autonómico máis amplo dotado con case 980.000 euros do Fondo de Cohesión e Transformación Social, destinado a financiar reformas, mantemento e compra de equipamentos en escolas infantís públicas de titularidade municipal e autonómica por toda Galicia.
Durante o percorrido polas instalacións, Fabiola García lembrou que este luns 7 de setembro comeza o quinto curso coa gratuidade universal no ciclo de cero a tres anos para todas as familias galegas, con independencia de que acudan a centros autonómicos, municipais, privados ou de iniciativa social. Unha aposta pola conciliación que, segundo destacou a titular de Política Social, permite a Galicia acadar unha taxa de escolarización do 64%, catorce puntos por riba da media estatal.
