Abanqueiro (Boiro) vai acoller este sábado 5 de setembro o espectáculo familiar Fábrica de Imposibles, unha sesión de ilusionismo de Román García para nenos e maiores. Será a partir das 20.00 horas e encádrase na axenda cultural da Deputación da Coruña, coa colaboración do Concello.
Fábrica de Imposibles é o novo espectáculo de maxia do ilusionista Román García, deseñado para marabillar e sorprender a todos os públicos. Neste show, cada número está elaborado para transportar aos espectadores a un mundo onde o que non se pode crer faise realidade, desafiando as leis da lóxica e a física, gozando dunha experiencia visualmente impactante.
A comedia de situación, a participación do público e a maxia son engrenaxes esenciais deste espectáculo, no que o público poderá divertirse e asombrarse a partes iguais.
Román García (A Coruña, 1977) é un recoñecido e galardoado ilusionista galego que destaca polo seu estilo innovador que combina maxia, ciencia, comedia e drama. Fai maxia de preto (micromaxia) e de escenario con propostas moi orixinais e desenfadadas.
