- O anticiclón achega aire cálido do sur, deixando ceos despexados tras as néboas matinais no interior e no litoral norte.
- Agárdanse máximas máis altas en toda a comunidade e vento moderado entre Bares e Fisterra.
Este xoves 3, San Gregorio Magno, un anticiclón sobre a comunidade deixará unha xornada de marcada estabilidade atmosférica e un incremento xeneralizado dos termómetros, que será especialmente evidente nos valores máximos durante as horas centrais do día, chegando ós 33 graos.
A xornada comezará con bancos de néboa matinais en comarcas do interior e na franxa costeira do norte, que irán desfacéndose a medida que avance a mañá para dar paso a ceos practicamente despexados. Co paso das horas, a nubosidade de tipo alto farase visible polo terzo norte da comunidade durante a tarde, sen impedir o paso do sol nin frear o ascenso térmico.
Xa cara ao final do día, a previsión apunta á posible entrada de brétemas costeiras en diversos puntos do litoral atlántico. No referente ao réxime de ventos, soprarán de compoñente norte-nordés de carácter frouxo no interior, aínda que manterán intervalos de intensidade moderada no tramo marítimo comprendido entre Estaca de Bares e Fisterra.
O noso mar; Vento do norte á mañá e á noite e do noroeste á tarde, forza 1 a 2 á mañá, 2 a 3 á tarde e 1 a 3 á noite. Mar ovellado. Visibilidade boa. Mar de fondo do noroeste, con ondas de 0.5 a 1 metros.
