O recoñecido fotógrafo Adolfo Enríquez, nado en Porto do Son. colaborador de O Barbanza e Código Cero, é o primeiro profesional español en acadar a Cámara de Ouro nos prestixiosos premios internacionais One Eyeland Awards, impulsa «O noso Camiño». Trátase dun proxecto artístico e colaborativo enfocado ao Xacobeo 2027 que busca capturar a esencia das rutas xacobeas a través da mirada directa de camiñantes e veciñanza.
A proposta baséase nunha instalación interactiva na que os participantes responden a preguntas sobre a súa experiencia e van encaixando pezas de gran formato ata construír unha escultura colectiva, única e diferente en cada concello. Tras arrancar en Mesía e pasar por Pontecesures, a iniciativa afronta a súa fase final de recollida de testemuños coas seguintes paradas:
- O Pino (Xoves 3 de setembro): A instalación situarase a partir das 09:00 horas en Santa Irene, a carón do albergue de peregrinos, punto neurálxico onde conflúen o Camiño Francés, o Primitivo e o do Norte.
- Fisterra (Venres 4 de setembro): Poderá visitarse desde as 10:30 horas na Praza da Constitución, fronte á oficina de Turismo onde se recolle a Fisterrana.
- Lestedo, Boqueixón (Domingo 6 de setembro): Aproveitarase a Feira de Lestedo e a gran concorrencia de visitantes para a última recollida de impresións.
Todas as achegas reunidas nestas esculturas servirán de guía e inspiración para que o creador de Porto do Son percorra as distintas rutas galegas tomando as imaxes definitivas. O proxecto culminará nun libro de fotografía dixital e de balde, que poderá consultarse proximamente na web oficial onosocamino.com.
