O Concello do Porto do Son publicou os resultados da xestión do residuo téxtil durante o período desde marzo ata o mes de xullo deste ano 2026. Segundo os datos facilitados pola Comisión Europea, a xestión eficiente dos 6.070 quilos de residuos téxtiles recollidos neste intervalo de tempo traduciuse nun aforro de 19,2419 toneladas de emisións de gases de efecto invernadoiro (CO₂).
Desde o Concello destacan estes “bos resultados” e poñen de manifesto “a importancia de continuar utilizando os colectores específicos, así como de fomentar prácticas responsables no tratamento da roupa e do calzado en desuso”.
Así, desde o Goberno local agradecen á veciñanza “o seu compromiso, concienciación e implicación nestas tarefas” e animan a continuar “depositando estes residuos unicamente nos recipientes autorizados para garantir a calidade do proceso e evitar que o material acabe contaminando outros circuítos de lixo”.
Na mesma liña, o alcalde, Luis Oujo, destacou que “estes bos resultados reafirman o compromiso deste goberno coa sustentabilidade e coa mellora continua dos servizos de recollida selectiva”.
“A reutilización e o correcto tratamento destes materiais supoñen un compromiso real coa sustentabilidade do noso territorio, coa loita contra o cambio climático e co futuro do medio ambiente”, rematou.
