O sinistro por alcance produciuse este mediodía na Avenida de Ferrol e mobilizou aos servizos de emerxencia da localidade.
Unha parella e o seu fillo lactante precisaron asistencia médica este mediodía tras verse implicados nun aparatoso accidente de tráfico no centro urbano de Ribeira. O sinistro, un choque por alcance no que se viron involucrados tres turismos, tivo lugar arredor das 13:30 horas na Avenida de Ferrol, á altura do número 43.
Un particular alertou ao servizo do 112 Galicia ao presenciar o impacto en cadea. Desde a central de emerxencias coordinouse de inmediato un operativo de resposta que mobilizou ao persoal do Servizo de Urxencias Sanitarias de Galicia-061, aos efectivos do GAEM (Grupo de Apoio ás Emerxencias Municipal), aos voluntarios de Protección Civil de Ribeira e a patrullas da Policía Local.
Como consecuencia do impacto, os dous adultos que viaxaban nun dos vehículos implicados foron evacuados en ambulancia ao centro hospitalario de referencia para a valoración das súas feridas. Xunto a eles viaxaba o seu bebé, quen tamén foi trasladado ao hospital por un familiar para unha revisión médica preventiva.
Os axentes da Policía Local encargáronse de regular o tráfico na zona e de instruír as dilixencias para esclarecer as causas da colisión.
