O Concello de Muros asinou os convenios de colaboración cos organizadores das Carrilanas de Esteiro e do Festival Castelo Rock, dúas das citas máis destacadas durante o verán.
Na sinatura dos convenios participaron a alcaldesa de Muros, María Lago, e a concelleira de Cultura, Caridad González, xunto a representantes da organización do Castelo Rock e das Carrilanas.
“Desde o Concello de Muros amosamos o noso compromiso con estes dous eventos, que non só funcionan como espazos masivos de ocio, senón que tamén promoven a nosa cultura, a lingua, a música en galego e tradicións populares como as Carrilanas, que forman parte da identidade de Muros”, sinalou a rexedora.
“No caso do Castelo, o seu novo formato contribúe ademais a revitalizar a zona do Mercado, unha prioridade para o goberno local, e as Carrilanas colocan a Muros no mapa como festa de interese turístico”, engadiu a alcaldesa.
Na mesma liña falou Caridad González, que espera “milleiros de persoas tanto nas Carrilanas cono no Castelo Rock, polo que é unha satisfacción apoiar estas celebracións”.
As Carrilanas de Esteiro celebraranse do 17 ao 19 de xullo, co seu tradicional Gran Prix e un festival de música, ademais doutras actividades para todas as idades.
O Castelo Rock será os días 6, 7 e 8 de agosto, unha vez máis cun completo cartel de concertos e actividades na rúa.
