Santiago de Compostela e as Rías Baixas vivirán este domingo unha xornada marcada pola entrada dos ventos do norte, que traerán un ambiente máis fresco e un descenso das temperaturas máximas, especialmente perceptible na capital galega. (22 graos).
Nas Rías Baixas, a mañá comezará con nubes baixas e bancos de néboa, que irán desaparecendo progresivamente para dar paso a claros durante a tarde, especialmente nas comarcas do sur. A pesar da mellora do estado do ceo, as temperaturas tamén descenderán lixeiramente debido á entrada do vento do norte.
En Santiago, os ceos permanecerán maioritariamente cubertos durante boa parte do día, con ambiente húmido e posibilidade de orballos ocasionais, aínda que sen precipitacións de importancia. As temperaturas mínimas apenas experimentarán cambios, mentres que as máximas baixarán respecto ás rexistradas nas últimas xornadas.
O vento soprará de compoñente norte con intensidade moderada ao longo da xornada, aumentando ao final do día no litoral atlántico, onde se esperan intervalos fortes que poderán deixar unha maior sensación de fresco nas zonas costeiras.
En conxunto, o domingo deixará un ambiente máis propio do Atlántico, con temperaturas máis suaves e ceos máis cubertos, tras varios días de calor e estabilidade. O luns recuperase a estabilidade e suben as temperaturas.
O noso mar; Vento do norte á mañá e do norte á tarde e á noite, forza 1 a 2 á mañá e 4 a 5 á tarde e á noite. Mar rizado á mañá e forte marusía á tarde e á noite. Visibilidade regular á mañá e boa á tarde e á noite. Mar de fondo do noroeste, con ondas de 0.5 a 1 metros á mañá e á tarde e 0.5 a 1.5 metros á noite.
