A Xunta de Galicia puxo en marcha un dispositivo de axuda humanitaria para colaborar na resposta á emerxencia provocada polos terremotos rexistrados en Venezuela. Ademais de coordinar o envío de material e fondos a través de Farmamundi e Cruz Vermella, o Goberno galego participou na organización do desprazamento dun equipo especializado en busca e rescate que partiu este sábado cara ao país suramericano.
O operativo de rescate saíu desde a base aérea de Torrejón de Ardoz, en Madrid, integrado no dispositivo español de emerxencias. O equipo galego está formado por seis bombeiros da Asociación Briegal (Búsqueda e Rescate Integral en Emerxencias de Galicia) e dous técnicos de emerxencias sanitarias da ONG Intervención, Axuda e Emerxencias (IAE).
A Consellería de Presidencia, Xustiza e Deportes, a través da Dirección Xeral de Emerxencias, encargouse de coordinar o desprazamento do persoal, a dotación do material necesario e a comunicación permanente co Centro Nacional de Seguimento e Coordinación de Emerxencias (Cenem).
Os profesionais galegos están especializados en busca e rescate urbano e contan con experiencia en anteriores misións internacionais, como os terremotos de Turquía ou as inundacións de Libia. Entre as súas capacidades figuran os traballos de corte e perforación, rescate con cordas, control de atmosferas e busca técnica de persoas atrapadas.
Paralelamente, a Dirección Xeral de Relacións Exteriores e coa Unión Europea e Cooperación ao Desenvolvemento activou os mecanismos de cooperación para canalizar axuda ás persoas afectadas.
Neste marco, a Xunta activou o convenio de colaboración con Farmamundi, que permitirá destinar de forma inmediata 24.000 euros a actuacións de emerxencia sobre o terreo. Ademais, axilizará a sinatura do convenio con Cruz Vermella para que os 50.000 euros previstos para accións de cooperación se dediquen integramente á atención da crise humanitaria en Venezuela.
O Executivo galego destaca que estas actuacións buscan contribuír tanto ás tarefas de rescate como á atención das necesidades máis urxentes da poboación afectada e á posterior reconstrución das zonas máis castigadas polos terremotos.
