Entre os feridos están o alcalde de Tui, a alcaldesa de Salvaterra de Miño e a alcaldesa do Rosal
Oito persoas resultaron feridas este venres tras un accidente de tráfico rexistrado na AP-9, ao seu paso por Santiago de Compostela, no que se viron implicados un camión, unha furgoneta e un turismo.
O sinistro produciuse arredor das 14:30 horas, momento no que o 112 Galicia recibiu varias chamadas de particulares alertando dunha colisión entre os tres vehículos no quilómetro 72 da autoestrada e advertindo da posible existencia de persoas feridas.
Tras recibir o aviso, o Centro Integrado de Atención ás Emerxencias mobilizou ao Servizo de Urxencias Sanitarias de Galicia-061, aos Bombeiros de Santiago de Compostela, á Garda Civil de Tráfico, á Policía Local e aos efectivos de Protección Civil. Ademais, tamén foi alertado o Grupo de Intervención Psicolóxica en Catástrofes e Emerxencias (GIPCE), por se fose necesaria a súa intervención.
Segundo confirmou posteriormente o persoal sanitario, oito persoas resultaron feridas como consecuencia do accidente e tiveron que ser trasladadas ao Hospital Rosaleda para recibir asistencia médica. Os rexedores viaxaban nun dos vehículos xunto a outros membros da Agrupación Europea de Cooperación Territorial (AECT) Río Miño cando regresaban dunha reunión.
Polo momento non transcenderon as circunstancias nas que se produciu a colisión nin o alcance das lesións sufridas polas persoas afectadas.
