“Hoxe é un gran día, un día de alegría para Galicia polo que levamos traballando moito tempo”. A deputada socialista Patricia Otero celebrou así a aprobación este martes 16 de xuño, na Comisión de Transportes do Congreso, do ditame da Proposición de Lei Orgánica de transferencia da titularidade e competencias da autoestrada do Atlántico (a AP-9) á comunidade autónoma, un texto saíu adiante malia o voto en contra do PP e de Vox, sinalou.
Otero felicitouse, na súa intervención en defensa do traspaso, por un acordo “froito do consenso e dun gran traballo entre tres grupos” para conseguir que Galicia sexa “dunha vez” a titular da AP-9. De feito, valorou que “con diálogo e busca de consenso conséguense máis cousas, que neste caso son boas para a comunidade”.
Criticou ao mesmo tempo ao PP porque, segundo dixo, “en Galicia di que quere que a autoestrada sexa galega, pero en Madrid vota en contra”. Pola contra, defendeu que o pacto respecta “o espírito e a vontade expresada polo Parlamento de Galicia”. Amais, afirmou que “no texto acordado queda clara a responsabilidade de cada Administración e que será o Estado o que asuma as consecuencias que se deriven de asuntos relacionados co seu período de titularidade da infraestrutura”.
“Hai que ter moita cara para dicir que traballan por conseguir a transferencia e despois votar en contra”, recriminou ao PP, engadindo que “cando o PP gobernaba, cun presidente galego e cunha presidenta do Congreso que galega, o partido chegou a bloquear ata en dúas ocasións a toma en consideración da lei orgánica para a transferencia”.
Patricia Otero asegurou que o PP ten “unha débeda coa cidadanía galega despois de que Aznar, no ano 2000, decidise estender a concesión da autoestrada ata o 2048 e, curiosamente, privatizala en 2003, só tres anos despois”.
Para a deputada socialista, aquela prórroga “hipotecou a Galicia” e “hoxe os galegos e galegas seguimos pagando as consecuencias”, dixo.
