O Concello de Boiro retomou este luns as clases para a obtención do título de educación secundaria para persoas adultas, que se viron suspendidas polo Estado de Alarma. As aulas vanse impartir de xeito presencial, en grupos de 10 persoas e, segundo informou o Concello, tendo en conta todas as medidas de seguridade e hixiene pautadas polas autoridades sanitarias.
Os exames, que estaba previsto que se celebrasen o 12 de xuño, adíanse para o día 19. Porén, o Goberno local explica que “aínda está por determinar si van ser telemáticos ou presenciais”, e que este punto será decisión da Consellería de Educación. No caso de que as probas non sexan online realizaranse na Casa da Cultura, igual que en anteriores ocasións, en horario de 9.30 a 14.00 horas.
Para calquera dúbida ou consulta, as persoas interesadas poden dirixir un correo ao enderezo educacion@boiro.gal ou ben chamar ao número de teléfono 981 84 84 25.
