A agrupación cidadá UCIN Galicia, a través do seu coordinador José Luis Calo, esixiu nun comunicado a aplicación inmediata da normativa europea destinada a reducir as cargas administrativas e fiscais que soportan miles de autónomos, á vez que reclamou a implicación de todos os grupos políticos para poñer fin a unha situación que consideran “inxusta e prexudicial” para un dos sectores fundamentais da economía galega e española.
O coordinador de UCIN Galicia, José Luis Calo, denunciou que o Goberno de España continúa atrasando medidas impulsadas desde a Unión Europea que permitirían simplificar trámites e facilitar a actividade de pequenos negocios, profesionais e emprendedores. “Resulta incomprensíbel que mentres Europa traballa para reducir a burocracia e facilitar a actividade económica dos autónomos, o Goberno de España siga mantendo obstáculos que dificultan o seu traballo diario. Cada día que pasa sen aplicar plenamente esta normativa europea é un día máis de castigo para quen sostén boa parte da nosa economía”.
Desde UCIN Galicia consideran que os autónomos levan anos soportando “un exceso de obrigacións administrativas, custos fiscais crecentes e unha falta de apoio institucional que pon en risco a viabilidade de moito proxectos empresariais”.
“Os autónomos non son unha fonte inesgotable de recadación. Son homes e mulleres que arriscan o seu patrimonio, xeran emprego e manteñen vivo o tecido económico das nosas cidades e pobos. Merecen menos trabas, menos burocracia e máis respaldo por parte das administracións públicas”, afirmou Calo.
A formación independente solicitou a todas as forzas políticas con representación institucional que “traballen conxuntamente para garantir a adaptación dela lexislación española aos criterios marcados pola Unión Europea, afastando este asunto de calquera confrontación partidista”.
“Os autónomos non entenden de cores políticas. O que necesitan son solucións. Por iso pedimos responsabilidade a todos os partidos para que defendan os intereses de quen levanta a persiana cada mañá e contribúen ao progreso de Galicia e de España”, engade, ao tempo que traslada “unha mensaxe de apoio ao colectivo de traballadores por conta propia”.
E apunta: “Queremos que cada autónomo galego saiba que non está só. Desde UCIN Galicia imos seguir defendendo os seus dereitos, denunciando calquera medida que os prexudique e esixindo reformas que lles permitan desenvolver a súa actividade con dignidade, estabilidade e seguridade xurídica”.
Finalmente, José Luis Calo advirte de que a organización continuará impulsando iniciativas públicas e institucionais para esixir “unha fiscalidade máis xusta, unha redución efectiva da burocracia e un marco normativo que favoreza a creación de emprego e o crecemento económico”.
“Se Europa xa marcou o camiño, non existe ningunha escusa para seguir atrasando medidas que beneficiarían a miles de autónomos. É hora de actuar e de poñer a quen crea riqueza no centro das políticas públicas”, finaliza.
