A comarca vai recobrando gradualmente a normalidade, e este regreso (un regreso con restricións e controlado, tanto por parte das autoridades como da cidadanía) apréciase especialmente na volta de actividades máis ou menos concorridas como os nosos mercadiños semanais. Este domingo foi a quenda do mercado ambulante de Rianxo, que volveu ao seu emprazamento habitual no centro da vila, na praza de Castelao, aínda que desta volta dun xeito máis espallado e ocupando boa parte do paseo da Ribeira
O Concello e a Policía Local fixeron saber que o desenvolvemento da actividade acompañouse das actuacións oportunas para que tanto os postos como os cidadáns que acudiron mantiveran as medidas sanitarias establecidas, por exemplo o uso de máscaras de protección ou a obriga de manter o distanciamento.
No mercadiño xuntáronse non só postos de alimentos, senón tamén de roupa, calzado ou complementos. Amais dos puntos de venda, instaláronse puntos de fornecemento de hidroxel e recomendacións hixiénicas para a cidadanía.
