A Pobra do Caramiñal promove estes días a súa oferta turística, cultural e festiva en FESTUR 2026, a Feira de Festas de Interese Turístico que se celebra en Silleda no marco de TUREXPO Galicia e da Feira Internacional Abanca Semana Verde de Galicia.
A Concellaría de Turismo participa no evento cun stand propio no que dá a coñecer os principais atractivos do municipio, desde os seus recursos naturais e patrimoniais ata a súa gastronomía e o amplo calendario de celebracións estivais. O obxectivo é reforzar a visibilidade da Pobra entre o público visitante e os profesionais do sector turístico.
Durante os días da feira, que se prolongará ata o vindeiro domingo, o espazo promocional ofrece información turística, material divulgativo e contidos relacionados coas festas e tradicións pobrenses, contribuíndo á difusión da identidade local e á captación de novos visitantes.
A participación en FESTUR permite ademais establecer contactos con empresas, entidades e operadores turísticos presentes no certame, favorecendo a creación de sinerxías e novas oportunidades de colaboración.
Desde a Concellaría de Turismo, que dirixe Estefanía Ramos, destacan a importancia de estar presentes en citas como FESTUR e TUREXPO Galicia, consideradas un dos principais escaparates do turismo galego ao reunir administracións, destinos e profesionais nun mesmo espazo.
Con esta iniciativa, o Concello da Pobra do Caramiñal reafirma a súa aposta pola promoción turística como ferramenta de dinamización económica e de posta en valor do patrimonio, a cultura e as tradicións locais.
