Xa está aberto o prazo de inscrición para participar no Programa Benestar en Balnearios de Galicia 2026, unha iniciativa dirixida á poboación residente na comunidade autónoma. Poderán beneficiarse as persoas de 60 ou máis anos, así como pensionistas maiores de 55, que ademais poderán acudir acompañadas doutra persoa.
O programa ofrece estadías de 10 días e 9 noites en réxime de pensión completa en calquera dos 15 balnearios galegos adheridos. As quendas desenvolveranse entre os meses de xullo e decembro e inclúen tratamentos termais baixo supervisión médica, ademais de actividades de animación sociocultural.
Desde os Servizos Sociais da Pobra do Caramiñal fan un chamamento á veciñanza que cumpra os requisitos para que se informe sobre esta convocatoria e formalice a súa solicitude.
As persoas interesadas poden realizar o trámite a través da sede electrónica da Xunta de Galicia ou recibir asesoramento nas oficinas municipais de Servizos Sociais. O prazo de presentación de solicitudes permanecerá aberto ata o vindeiro 26 de xuño.
