Galicia quedará este martes nunha situación meteorolóxica de transición entre as altas e as baixas presións, o que favorecerá unha xornada marcada pola variabilidade do tempo.
Durante a mañá, os ceos estarán parcialmente nubrados, con maior presenza de nubes na metade norte da comunidade e nas zonas do litoral atlántico, onde se agardan chuvascos dispersos. Pola contra, no sur de Galicia predominarán os ceos máis despexados, especialmente a medida que avance o día.
No que respecta ás temperaturas, as mínimas experimentarán un lixeiro ascenso, mentres que as máximas rexistrarán un moderado descenso en comparación cos valores da xornada anterior (máximas de 21 a 22 graos).
En canto ao vento, soprará frouxo de compoñente oeste-noroeste, aínda que se prevén intervalos de intensidade moderada ao longo do litoral galego.
O noso mar: Vento do noroeste á mañá, do noroeste á tarde e variable á noite, forza 2 a 3 á mañá, 3 a 4 á tarde e 1 a 3 á noite. Marusía á mañá e á tarde e mar ovellado á noite. Visibilidade boa. Mar de fondo do noroeste, con ondas de 1 a 2 metros á mañá e á tarde e 1.5 a 2.5 metros á noite.
