A Xunta de Galicia vén de dar luz verde a unha nova actuación en materia de mobilidade sostible no concello de Outes, coa aprobación definitiva do proxecto de trazado dunha senda peonil e ciclista na estrada AC-550, cun investimento superior aos 1,3 millóns de euros.
A intervención permitirá habilitar un itinerario mixto de preto de 2,3 quilómetros de lonxitude, no treito comprendido entre os puntos quilométricos 62+120 e 64+410, co obxectivo de mellorar a seguridade viaria e facilitar os desprazamentos a pé e en bicicleta entre Cruceiro de Roo e o núcleo urbano da Serra de Outes.
O proxecto, impulsado pola Consellería de Vivenda e Planificación de Infraestruturas a través da Axencia Galega de Infraestruturas, prevé a execución dunha senda adxacente á estrada autonómica, mantendo o seu trazado. Terá un ancho de 2,5 metros e discorrerá inicialmente pola marxe esquerda nun pequeno tramo para continuar pola dereita, conectando as beirarrúas do núcleo rural de Viro co inicio da travesía urbana.
A actuación inclúe tamén medidas para garantir a accesibilidade e a integración coa contorna, como a adaptación de accesos ás parcelas, a colocación de pavimento podotáctil nos cruces e a execución de sistemas de drenaxe. Ademais, incorporarase unha canalización soterrada para redes de telecomunicacións co fin de minimizar futuras afeccións.
O pavimento da senda será de formigón coloreado en ton terrizo, cunha base en formigón gris, e contará cunha beiravía sobreelevada de 50 centímetros, que se adaptará nos accesos. O prazo estimado de execución das obras é de 12 meses.
A aprobación do proxecto implica tamén a declaración de utilidade pública e a urxente ocupación dos 98 predios necesarios para levar a cabo a intervención. A Xunta prevé aprobar o proxecto construtivo no segundo semestre deste ano, paso previo á licitación das obras.
Esta actuación contará con financiamento europeo a través do programa Feder 2021-2027 e enmárcase na estratexia autonómica para reforzar a seguridade viaria e avanzar cara a unha mobilidade máis sostible e integrada no territorio.
