Ribeira abre o prazo de inscrición para os cursos en liña de Mocidade Formada
O Concello de Ribeira abriu o prazo de inscrición para os cursos en liña do programa Mocidade Formada, unha proposta dirixida á mocidade maior de 16 anos que busca facilitar a aprendizaxe formal e informal a través dunha modalidade gratuíta e flexible.
A actividade desenvolverase na Casa da Xuventude e ofrece un total de 100 prazas. As persoas interesadas poderán anotarse nun máximo de dous cursos entre a oferta dispoñible: educación inclusiva e atención á diversidade, manipulación de alimentos, protección integral á infancia e á adolescencia fronte á violencia, e calidade pedagóxica das actividades de tempo libre.
A concelleira de Xuventude, Carmen Pérez, explicou que o proxecto Mocidade Formada se estrutura en tres modalidades: pílulas informativas, formación presencial e formación en liña. Nesta última, subliñou, a rapazada poderá aprender “sobre distintos temas cunha flexibilidade total, a diferentes ritmos e dende distintos lugares e días”.
A programación complétase co programa de ocio Por fin é finde!, destinado á mocidade a partir dos 12 anos. As inscricións poden formalizarse presencialmente na Casa da Xuventude ou a través do correo electrónico xuventude@ribeira.gal.
