O Concello da Pobra do Caramiñal celebrará o vindeiro 28 de maio unha reunión informativa dirixida a persoas propietarias de locais comerciais e inmobiliarias interesadas en participar na bolsa municipal de baixos do programa “EMPRENDECO-POBRA”, unha iniciativa destinada a impulsar novas aperturas comerciais e revitalizar o tecido económico local.
O encontro terá lugar ás 19.00 horas no Coworking Pobra e servirá para explicar o funcionamento desta bolsa municipal de locais comerciais baleiros, así como os requisitos de participación, as condicións de adhesión e a documentación necesaria para incorporar os inmobles ao programa.
“EMPRENDECO-POBRA” é unha iniciativa impulsada polo Concello coa colaboración da Deputación da Coruña, orientada a fomentar o emprendemento comercial e dar uso a baixos actualmente sen actividade no municipio.
O programa contempla que o propio Concello alugue os locais adheridos á bolsa municipal para posteriormente poñelos á disposición das persoas emprendedoras beneficiarias, facilitando así a apertura de novos negocios na vila.
Desde o goberno local subliñan que esta medida busca contribuír á revitalización comercial da Pobra do Caramiñal, favorecendo a ocupación de locais baleiros e creando novas oportunidades económicas e de emprego vinculadas ao comercio de proximidade.
A reunión contará cun número limitado de prazas, polo que será necesario confirmar asistencia previamente. O prazo límite para inscribirse remata o 26 de maio.
As persoas interesadas poden formalizar a inscrición a través do formulario habilitado polo Concello:
Formulario de inscrición EMPRENDECO-POBRA
Tamén é posible anotarse chamando ao teléfono 981 843 280, extensión 2035, de luns a venres entre as 9.00 e as 14.00 horas.
