A Real Academia Galega de Ciencias celebrou hoxe no Pazo de San Roque o acto de ingreso do catedrático de Enxeñaría Química da Universidade de Santiago de Compostela, Gumersindo Feijoo Costa, como académico numerario da sección de Ciencias Técnicas da institución. O novo académico pronunciou o seu discurso baixo o título “Do dato ao impacto: marco científico da sustentabilidade”. A encargada de realizar a laudatio foi a académica Herminia Domínguez, catedrática de Enxeñería Química da Universidade de Vigo.
O acto foi aberto polo presidente da RAGC, Juan Lema, e contou coa presenza doutros académicos, así como de numerosas autoridades políticas, científicas e académicas. Entre elas, a conselleira do Mar, Marta Villaverde; o secretario xeral de Universidades, José Alberto Díez de Castro; a reitora da USC, Rosa Crujeiras; a directora da Escola Técnica Superior de Enxeñaría da USC, Julia González; a decana da Facultade de Química da Universidade de Vigo, Ángeles Peña; e a presidenta do Consello da Cultura Galega, Rosario Álvarez.
“Xa non abonda con producir máis”
Durante a súa intervención, Juan Lema destacou que a incorporación de Gumersindo Feijoo “supón para a Academia reforzar unha visión científica da sustentabilidade, imprescindible para afrontar os grandes retos ambientais e industriais do noso tempo”.
O presidente da RAGC, que dirixiu a tese de doutoramento do novo académico, puxo en valor unha traxectoria “marcada polo rigor científico, a innovación e a capacidade de crear equipo”, convertendo Santiago “nun referente internacional en sustentabilidade ambiental e análise do ciclo de vida”.
Lema incidiu ademais na necesidade de avanzar cara a modelos produtivos máis sostibles: “Xa non abonda con producir máis, nin sequera con producir mellor; cómpre facelo dunha maneira sostible, responsable e positiva para o medio”. Neste contexto, salientou a relevancia desta visión para sectores estratéxicos en Galicia como o vinícola, o lácteo, o madeireiro, a alimentación ou a pesca.
“Non é posible mellorar aquilo que non se mide”
No seu discurso de ingreso, Gumersindo Feijoo abordou a evolución do concepto de sustentabilidade ata converterse “nun campo científico rigoroso, apoiado en metodoloxías cuantitativas e indicadores verificables”.
O novo académico analizou ferramentas como a análise de ciclo de vida, as pegadas ambientais —como a de carbono ou hídrica— e os indicadores de economía circular, que permiten avaliar o impacto das actividades humanas sobre o medio ambiente e a sociedade.
Segundo explicou, “estas metodoloxías constitúen a base para unha toma de decisións máis informada e responsable”. Feijoo exemplificou a aplicación destas ferramentas en ámbitos como as cidades, a xestión da auga ou os sistemas alimentarios, facendo especial fincapé na necesidade de reducir desperdicios e emisións.
Neste sentido, reivindicou a dieta atlántica como modelo sostible, afirmando que “forma parte do noso acervo cultural, coida da saúde das persoas e tamén da saúde ambiental do noso planeta”.
Un dos eixes centrais da súa intervención foi a importancia da medición para avanzar en sustentabilidade. “Non é posible mellorar aquilo que non se mide”, asegurou, defendendo o desenvolvemento de indicadores fiables que permitan avaliar e facer seguimento das políticas e prácticas sostibles.
Feijoo concluíu cun chamamento á responsabilidade colectiva e á integración do coñecemento científico na toma de decisións públicas e privadas, defendendo “modelos de desenvolvemento capaces de garantir o benestar das xeracións presentes sen comprometer o das futuras”.
Pioneiro na sustentabilidade ambiental
Na súa laudatio, Herminia Domínguez destacou que Gumersindo Feijoo foi pioneiro na creación da liña de Sustentabilidade Ambiental en Galicia e na introdución en España da metodoloxía de análise ambiental de produtos e procesos.
A académica salientou tamén iniciativas como Pescaenverde, unha marca de garantía de calidade que acredita peixe e marisco con baixa pegada de carbono e alta taxa de retorno enerxético, implantada xa en 30 confrarías galegas, ademais de Barbate e Conil.
“Gumersindo Feijoo aúna a excelencia académica cunha visión multidisciplinar, orientada á investigación aplicada e cunha inquedanza por mellorar o benestar das persoas e do planeta”, concluíu Domínguez.
