A artista bergantiñá Sés (María Xosé Silvar), unha das grandes figuras da música galega, estará este sábado no Araño (Rianxo) para participar no remate do Festival Hórreo Vivo, evento cultural, gastronómico, lúdico e musical organizado pola Asociación Cultural A Carballeira de Baia (Araño) coa colaboración do Concello de Rianxo. Será na Carballeira de Baia o sábado 23 de maio a partir das 22.00 horas. Trátase dunha proposta musical encadrada na axenda da Rede Cultural da Deputación da Coruña.
Segundo informan dende a Deputación, Sés estará acompañada da súa habitual banda de sete músicxs e presentará un concerto en gran formato no que fai un percorrido polas cancións dos seus nove discos. Un espectáculo potente e emotivo no que conviven os temas máis emblemáticos da súa traxectoria coas composicións máis recentes, nun directo de alto nivel musical e gran conexión co público.
Lembrar que a artista estivo este mesmo ano en Asados (Rianxo) presentando o seu novo libro-disco, Nadando na incerteza. Trátase do primeiro libro da cantautora, que vai acompañado do seu último traballo discográfico. Nadando na incerteza é en palabras da autora “un traballo acústico e fundacional que inaugura unha nova etapa”. Son, engade, “cancións despoxadas que respiran soas, coa palabra e a melodía no centro”.
