Dende a A. C. Altofalante, a través do seu presidente David Casais, emitiron un comunicado no que expresan a súa “máis firme condena ante o acto vandálico cometido contra o monumento en memoria das vítimas do franquismo, situado no Malecón de Ribeira”. Fan saber que “non estamos diante dun feito illado nin dunha simple falcatruada, senón dun ataque directo á memoria democrática, á dignidade das persoas represaliadas pola ditadura e ao deber colectivo de preservar a verdade histórica fronte ao esquecemento e a manipulación”.
Engaden que “a memoria histórica non pode ser tratada como unha cuestión secundaria nin incómoda” e que “nun momento no que determinados sectores políticos e mediáticos pretenden revisar a historia para branquear a ditadura franquista, faise máis necesario ca nunca defender os espazos de memoria e denunciar os discursos reaccionarios que buscan relativizar corenta anos de represión, censura e ausencia de dereitos e liberdades”.
E apuntan: “Cando desde as institucións se presentan figuras do franquismo como aperturistas ou se atacan referentes da loita antifranquista e popular, como aconteceu recentemente desde o Partido Popular no Parlamento galego, estase contribuíndo a normalizar unha visión profundamente perigosa da nosa historia. Ese tipo de discursos teñen consecuencias. Alimentan a desmemoria, banalizan o fascismo e crean un caldo de cultivo no que moita xente nova acaba asumindo relatos falsos sobre a ditadura, chegando incluso a pensar que baixo un réxime autoritario se vivía mellor. Fronte a iso, temos a responsabilidade colectiva de lembrar o que realmente significou o franquismo para Galiza e para o conxunto do Estado español: persecución política, asasinatos, cárcere, torturas, exilio, medo e silencio”.
Altofalante lembra tamén que “Ribeira coñece ben esa realidade” e que “figuras como Manuel Lustres Rivas, xornalista, escritor e nacionalista ribeirense, asasinado polos franquistas en 1936, representan a tantas persoas que sufriron a barbarie fascista por defender a liberdade, a cultura galega e a dignidade do noso pobo. A súa memoria, como a de tantas outras vítimas, merece respecto e protección. Atacar un monumento de memoria democrática significa tamén atacar ese legado colectivo que durante décadas se tentou borrar”.
A asociación remata lembrando que “resulta intolerábel que mentres se producen agresións contra espazos de memoria, continúen existindo no rueiro municipal referencias a figuras vinculadas á ditadura franquista, como a avenida Miguel Rodríguez Bautista, unha situación denunciada desde hai anos por colectivos como a Comisión pola Memoria Histórica da Barbanza. Non se pode falar de convivencia democrática mentres se manteñen símbolos que honran a responsábel dun réxime fascista”. Por todo isto, esixen ao Concello de Ribeira unha condena pública e contundente destes feitos, a presentación das correspondentes denuncias para identificar ás persoas responsábeis e a restauración inmediata da placa do monumento vandalizado. “Defender a memoria democrática non é abrir feridas; é impedir que se pechen en falso”, sinalan.
