O Concello de Ribeira acondicionará, unha vez finalice o curso académico, o aparcamento do IES Leliadoura debido ao deterioro do seu pavimento. A intervención será na época estival para non entorpecer a actividade da comunidade educativa, segundo fixeron saber a alcaldesa, María Sampedro, e máis a concelleira de Educación Nucha Brión, que engadiron que con estes traballos “cumprirase así cun compromiso que asumimos co director do centro durante o último Consello Escolar Municipal; unha petición reiterada en varias ocasións pola edil”.
Esta obra consistirá no aglomerado dunha superficie de 650 metros cadrados por un importe estimado de 12.000 euros, a executar pola
empresa Nemesio Ordóñez, S.A. Aproveitarase para pintar as prazas de estacionamento e reforzar a sinalización viaria horizontal.
