A semana comezará en Galicia cunha circulación do suroeste que traerá o paso dunha fronte cálida pola tarde. Pola mañá agárdanse néboas no interior, ademais de nubes de tipo medio e alto no resto do territorio, con maior presenza de nubosidade na metade oeste.
Co avance do día, os ceos iranse cubrindo e as chuvias estenderanse a toda a Comunidade durante a tarde, sendo de intensidade moderada na franxa atlántica. As temperaturas mínimas sufrirán un lixeiro descenso, mentres que as máximas permanecerán sen grandes cambios(16 a 17 graos).
Os ventos soprarán do suroeste, moderados en xeral, con refachos fortes entre Bares e Fisterra.
O noso mar: Vento do sudoeste á mañá, do sudoeste á tarde e do sur á noite, forza 2 a 3 á mañá e 4 a 5 á tarde e á noite. Mar ovellado á mañá e forte marusía á tarde e á noite. Visibilidade boa á mañá e regular á tarde e á noite. Mar de fondo do noroeste, con ondas de 1.5 a 2 metros.
