O alcalde de Rianxo, Julián Bustelo, está a participar esta tempada nunha xira de encontros veciñais (Encontros co Alcalde) nas parroquias destinados a escoitar as demandas e propostas das e dos residentes nos núcleos. Esta semana reuniuse coa veciñanza do Araño no Centro Cultural da Capela, e (este xoves) coa de Isorna na Escola da Bacariza.
Na Capela, o rexedor repasou algúns dos proxectos máis destacados que se executarán en datas vindeiras e comentou outras necesidades que cómpre abordar dende o Concello. Destacou que entre os proxectos que axiña serán unha realidade está a mellora do acceso e do entorno á Igrexa e ao hórreo (os traballos relativos á primeira fase desta actuación xa comezaron a semana pasada). Ademais, salientou que a comezos deste ano tamén foi aprobado “un importante proxecto”, cun orzamento de algo máis de 185.000 euros, para ampliar dunha maneira moi destacada a rede de abastecemento de auga na parroquia.
Na Bacariza levouse a cabo un novo faladoiro cos veciños e veciñas no que se abordaron as necesidades da aldea e dos proxectos que axiña se levarán a cabo.
Lembrar que durante os meses de maio e xuño o alcalde e os membros do Goberno percorrerán as parroquias do municipio para informar do traballo que se está facendo, para resolver dúbidas e para recoller as propostas e demandas que os veciños e veciñas queiran propor.
