A conselleira do Mar, Marta Villaverde, visitou este xoves o porto de Aguiño para manter unha reunión coa confraría de pescadores e avanzar en distintas actuacións destinadas a mellorar as infraestruturas portuarias vinculadas á actividade profesional.
Durante a visita, na que estivo acompañada polo presidente de Portos de Galicia, José Antonio Álvarez, a titular de Mar destacou a colaboración entre a administración autonómica e o sector para definir as principais necesidades da dársena ribeirense.
Entre as actuacións abordadas figura a mellora da instalación de subministración de auga salgada da zona de tratamento do percebe situada no interior da lonxa. Segundo explicou a conselleira, Portos de Galicia está a traballar nun novo deseño do sistema e xa se acordou coa confraría a incorporación dunha nova bomba para optimizar o seu funcionamento.
Ademais, durante o encontro analizáronse distintas alternativas para a reforma da nave de redes, un proxecto que podería optar a financiamento a través dos fondos GALP ou do plan de equipamentos portuarios con fondos FEMPA.
Outro dos asuntos tratados foi a reparación da zona de rampla somerxida do porto. A conselleira ratificou o compromiso de Portos de Galicia para executar esta actuación, despois de terse completado xa os traballos na parte terrestre da infraestrutura. A intervención na zona mergullada adaptarase aos tempos marcados pola actividade profesional da frota.
Por último, tamén se abordaron as necesidades de atraque das embarcacións da zona. Neste sentido, Portos de Galicia comprometeuse a estudar e presentar a alternativa tecnicamente máis viable para dar resposta ás demandas do sector pesqueiro local.
