Juan Caballero (texto e fotos). Este venres 8 de maio solta amarras desde as instalacións do Real Club Náutico Portosín o Campionato de España de ILCA Máster, destacada competición no panorama velístico nacional debido ao brillante nivel dos seus participantes, entre os que se atopan tres ouros e varios diplomas olímpicos, campións do mundo e unha excelente representación da comunidade galega.
Do mesmo xeito que xa acontecera en 2021, cando o Real de Portosín albergou a edición dese ano, a calidade técnica e deportiva dos participantes é excelente, preparados todos os deportistas, preto de 70 entre todas as categorías do ILCA Máster, para competir ata o vindeiro domingo nas augas da ría de Muros e Noia.
Na desagregación e por categorías atopamos que en Máster tomarán parte 22 participantes; en Grand Máster, 28; en Great Grand Máster, 8; e en Apprentince Máster, 5, tanto en ILCA 6 como no 7, ambas as modalidades de competición olímpica, sendo 48 para os primeiros e 18 para os segundos.
Desta maneira considérase Aprendiz Máster, tanto en ILCA 7 (masculino) e ILCA 6 (masculino e feminino) aos regatistas entre 30 e 44 anos. Máster en ILCA 7 (masculino) e ILCA 6 (masculino e feminino) aos regatistas entre 45 e 54 anos. Grand Master en ILCA 7 (masculino) e ILCA 6 (masculino e feminino) aos regatistas entre 55 e 64 anos. Great Grand Master en ILCA 7 (masculino) e ILCA 6 (masculino e feminino) aos regatistas entre 65 e 74 anos. E Legends, en ILCA 6, aos maiores de 75 anos.
Durante as tres xornadas o top na auga está previsto ás 12 do mediodía e a entrega de premios, o domingo ao 17.00 h.
O Campionato de España de ILCA Máster, arrincou este xoves 7 de maio co protocolo de medicións e confirmación de participantes, xerando gran ambiente e movemento de medidores, xuíces e deportistas nas instalacións do Club.
