O Plan Único 2026 da Deputación da Coruña alcanza os 153 millóns de euros e supera xa nun 11% ao do ano pasado
O pleno da Deputación da Coruña aprobou unha ampliación de 65 millóns de euros para o Plan Único (POS+2026), elevando o investimento total ata os 153 millóns, fronte aos 88 millóns consignados inicialmente. A cifra supón un incremento de preto do 11% respecto aos 138 millóns mobilizados en 2025.
O presidente provincial, Valentín González Formoso, destacou que este programa “é a mellor ferramenta que teñen os concellos para garantir servizos, investir e planificar con estabilidade”, especialmente nun contexto marcado pola inflación, o encarecemento da enerxía e o aumento dos custos dos servizos públicos.
O POS+ consolídase así como o principal instrumento de cooperación municipal en Galicia, cun modelo baseado nun reparto “obxectivo, transparente e equitativo” entre os 93 concellos da provincia. Ademais, son os propios municipios os que deciden en que investir os fondos, en función das súas necesidades.
O plan permite financiar desde obras e infraestruturas ata programas sociais, culturais ou ambientais, aínda que a Deputación destaca tamén o seu papel clave no sostemento de servizos básicos como o alumeado público, a limpeza, o mantemento das vías ou a atención social.
Segundo Formoso, “sen este apoio, moitos concellos terían dificultades para manter o nivel actual de servizos”, polo que a institución provincial está a realizar “un esforzo extraordinario” para responder ás necesidades municipais.
Reparto por comarcas
O investimento distribúese de maneira equilibrada en todo o territorio. Na comarca da Coruña supera os 36,2 millóns de euros, mentres que na de Santiago acada os 43,1 millóns, sendo a maior dotación. En Ferrolterra, Eume e Ortegal sitúase por riba dos 28,6 millóns, e en Bergantiños e Costa da Morte supera os 26,3 millóns.
No caso do Barbanza, o Plan Único mobiliza 18,6 millóns de euros, reforzando a capacidade dos concellos para mellorar servizos e impulsar o desenvolvemento local.
O presidente provincial concluíu subliñando que este modelo “garante igualdade territorial e responde ás necesidades reais da cidadanía”, ao tempo que reclamou un maior financiamento municipal por parte doutras administracións.
| Comarcas | POS + inicial/ 2026 | POS+ AD2/2026 | TOTAL POS + 2026 |
| A Coruña | 20.180.578,46 | 16.063.590,47 | 36.244.168,93 |
| Santiago | 25.305.801,37 | 17.833.699,65 | 43.139.501,02 |
| Bergantiños | 15.250.837,43 | 11.066.759,55 | 26.317.596,98 |
| Ferrol | 16.175.520,48 | 12.441.647,73 | 28.617.168,21 |
| Barbanza | 11.087.262,26 | 7.594.302,60 | 18.681.564,86 |
| Total | 88.000.000,00 | 65.000.000,00 | 153.000.000,00 |
