Este sábado 25, San Marcos, estaremos nunha situación de transición entre altas e baixas presións, o que deixará unha xornada de certa inestabilidade, aínda que con predominio do tempo seco na metade oeste.
Nas Rías Baixas e en Santiago, a mañá estará marcada pola presenza de nubes baixas e brétemas, especialmente en zonas costeiras e vales próximos, que irán levantando co paso das horas. A partir do mediodía, abriranse claros e predominarán os ceos pouco nubrados, con presenza de nubes altas.
Pola tarde, a inestabilidade concentrarase no interior do leste de Galicia, onde poderán medrar nubes de evolución con algún chuvasco treboento, especialmente nas provincias de Lugo e Ourense, sen incidencia directa nas Rías Baixas.
As temperaturas experimentarán un comportamento desigual: lixeiro descenso no terzo norte e ascenso no resto, máis acusado no sur, polo que nas Rías Baixas se agarda un ambiente algo máis cálido durante as horas centrais do día (22 a 26 graos).
O vento soprará frouxo de compoñente norte, con intervalos de moderado no litoral atlántico, deixando unha xornada en xeral tranquila no oeste galego.
O domingo 26, teremos nubes e claros e suba das temperaturas chegando ós 25 a 27 graos.
O noso mar: Vento do norte, forza 3 a 4 á mañá, 4 a 5 á tarde e 3 a 5 á noite. Marusía á mañá e forte marusía á tarde e á noite. Visibilidade boa. Mar de fondo do oeste, con ondas de 1 a 1.5 metros.
