O Concello de Muros leva semanas desenvolvendo traballos de mantemento e acondicionamento nas súas zonas verdes, logo dun inverno marcado por fortes temporais e intensas precipitacións.
As actuacións, impulsadas pola Concellería de Obras e Servizos, centráronse en distintos puntos do municipio. Entre eles, destacan a zona do cemiterio de Atalaia, a área de lecer do Pozo de Cachón, Agro Vello en Tal, Ventín e Esteiro. Neste último núcleo realizáronse labores no paseo fluvial do río Riomaior, así como nas áreas recreativas da Alameda, do Artón e de Parameán.
Segundo explicou a concelleira de Obras e Servizos, Laura Rivadeneira, os traballos están a levarse a cabo tanto con medios propios —a través da brigada municipal— como coa colaboración de empresas externas. “O obxectivo é poder actuar no maior número de espazos posible e recuperar o seu bo estado tras os danos ocasionados polo inverno”, sinalou.
Pola súa banda, a alcaldesa, María Lago, subliñou a importancia destas intervencións para a cidadanía: “Queremos mellorar o estado xeral dos nosos espazos naturais e garantir que veciñanza e visitantes poidan gozar dun entorno coidado, cómodo e seguro, especialmente nunha época na que aumenta o seu uso”.
O Concello avanzou que estes traballos continuarán nas vindeiras semanas, estendéndose ás praias e ás zonas verdes de todas as parroquias do municipio.
