Por segundo ano consecutivo, as entidades ecoloxistas ADEGA, Limpiarousa, Surfrider España e ProxectoaMARte organizan unha recollida simultánea de paus de batea nas praias de Galiza, baixo o nome de Tarugotón.
A iniciativa, que se desenvolverá nesta fin de semana do 27 e 28 de febreiro e 1 de marzo, está aberta tamén á participación de centros educativos durante calquera día da vindeira semana. Trátase dunha actividade de ciencia cidadá que busca contribuír á conservación das nosas costas e sensibilizar á poboación sobre a problemática dos paus de batea, coñecidos como tarugos, e doutros residuos mariños presentes nos areais galegos.
O Tarugotón poderá realizarse en calquera praia do litoral galego.
As organizacións convocantes convidan a cidadanía a escoller un areal e proceder á recollida de tarugos por un máximo dunha hora na liña superior da marea, zona onde adoitan acumularse os paus de batea.
As persoas participantes deberán contabilizar o número total de tarugos recollidos, así como indicar o seu estado (cantos están enteiros ou fragmentados), e recompilar información básica sobre a acción (lugar de recollida -praia e concello-, número de persoas participantes e fotografías da xornada). Os datos deberán remitirse a través do formulario habilitado para a campaña Tarugotón 2026.
Co obxectivo de facilitar a organización, recoméndase que calquera persoa ou grupo interesado en participar o comunique previamente ás entidades coordinadoras segundo a zona:
–Zona Rías Baixas: limpiarousa@gmail.com
–Zona Costa da Morte e Mariña Lucense: itziar@adega.gal
–Zona A Coruña e Ferrol: proxectoamarte@gmail.com
ADEGA engade que o Tarugotón pretende non “só retirar estes residuos das praias galegas, senón tamén xerar datos útiles para coñecer mellor a dimensión deste problema ambiental e reforzar a conciencia social sobre a necesidade de protexer os ecosistemas mariños”.
Na edición anterior, o #Tarugotón25 mobilizou arredor de 300 persoas en todo o litoral galego e permitiu retirar máis de 16.000 paus de batea en apenas tres días.
Estes elementos plásticos utilízanse no cultivo do mexillón e, cando se desprenden, rematan nas praias, onde supoñen un problema ambiental recorrente.
As entidades organizadoras agardan repetir e ampliar a participación este ano, e continuar abrindo diálogo con administracións e sector bateeiro para buscar solucións a longo prazo.
