Un incendio rexistrado de madrugada no paseo das Carolinas, en Ribeira, deixou dous coches totalmente calcinados e un terceiro afectado parcialmente cando estaban estacionados á altura do establecemento Náutica A Poutada.
O suceso produciuse arredor das 6.30 horas, cando un particular chamou ao 112 Galicia tras escoitar un forte ruído que lle pareceu unha explosión e comprobar que dous vehículos ardían e un terceiro se vía afectado polas lapas. Os coches danados foron un Suzuki Jimny e un Seat León, calcinados por completo, e un Daewoo Lanos, que sufríu danos parciais ao estar estacionado ao carón dos outros.
A central do CIAE 112 Galicia mobilizou de inmediato aos bombeiros do parque comarcal de Ribeira, así como efectivos da Policía Local e da Policía Nacional. Os profesionais de extinción, pertencentes ao Consorcio Provincial Contraincendios e Salvamento da Coruña con base en Xarás, sofocaron o lume, arrefriaron os vehículos para evitar reproducións e minimizáronse así os danos na zona.
Unha vez rematada a extinción, a Policía acordonou a área onde estaban aparcados os coches afectados para facilitar o traballo das unidades especializadas que deberán determinar a orixe do incendio. Por agora descoñécense as causas concretas do lume, aínda que as investigacións seguen abertas para aclarar se foi un fallo mecánico, eléctrico ou unha acción intencionada
