O municipio de Noia agocha a Devesa de Nimo, un deses tesouros descoñecidos por moitos dos habitantes da comarca banbanzá malia ser un dos bosques galegos dun valor ecolóxico e medioambiental de enorme valía.
Situado á beira do río Tambre, este bosque mixto de carácter atlántico abrangue unhas 150 hectáreas de terreo que acubilla unha ricaz vexetación de ribeira con numerosos exemplares de carballos, salgueiros, acivros, e abeleiras, amais de fieitos, fungos e liques entre os que vive unha fauna moi diversa con especies coma lontras, garzas, xabarís, raposos, coellos e aves coma o martiño pescador.
A da Devesa de Nimo é unha espectacular ruta que comeza na central hidroeléctrica do Tambre, unha xoia industrial con aspecto catedralicio” deseñada polo arquitecto galego Antonio Palacios, artífice doutros edificios coma o Templo da Veracruz (O Carballiño) ou o Templo Votivo do Mar.
Desde alí, un carreiro segue o curso do río pola súa beira esquerda, adentrándose nun bosque máxico “que convida a conectar coa natureza no seu estado máis puro”.
Esta devesa forma parte da vintena de bosques máis fermosos e sorprendentes de Galicia, nos que é doado atopar soutos milenarios, frondosas fragas, devesas plenas de maxia e bosques únicos nestas latitudes: un auténtico paraíso natural que ben se pode dicir que aínda está por explorar-
