A Asociación Boirense de Empresas (ABE) realizou na mañá deste venres 13 de febreiro o sorteo dos premios da campaña de San Valentín entre os 1.207 rexistros de compras recibidos a través da web da entidade, co obxectivo de premiar ás persoas que apostan polo comercio local nestas datas especiais.
Entre o 3 e o 13 de febreiro, os clientes que realizaron compras nos establecementos asociados puideron participar no sorteo de tres cestas saudábeis, compostas por froitas variadas e produtos de tempada, rexistrando os seus tíckets ou facturas a través da aplicación dispoñíbel en www.abe.gal.
Unha vez máis, a ABE apostou polo selo Produtos dos nosos socios, garantindo que os premios proceden integramente de froiterías asociadas, o que asegura a máxima frescura, calidade e proximidade dos produtos, reforzando así o compromiso coa economía local e coa identidade comercial de Boiro.
A patronal engade que esta iniciativa está “plenamente aliñada coa filosofía da marca #SomosBoiro, que promove un consumo responsábel, o apoio ao comercio de proximidade e a posta en valor do tecido económico local como motor de cohesión social e desenvolvemento”.
Persoas premiadas:
Nadia Porres, por unha compra en BoiroFarma
Lucía Ordoñez, por unha compra en Estación de Servizo Garlou
Marcelina Viturro, por unha compra en Alimentación Teresa – Secreto Gallego
As persoas premiadas xa teñen á súa disposición desde este venres 13 mesmo os premios.
