Este xoves celebrouse unha nova concentración da Plataforma pola Sanidade Pública do Barbanza no Centro de Saúde, unha mobilización que volve contar co apoio do BNG. Dende a agrupación sinalaron que “a poboación ribeirense segue sufrindo o deterioro do servizo de saúde pola falta de profesionais que garantan unha atención de calidade”.
E engadiron: “Actualmente segue sen cubrirse unha praza de médico de familia, falta unha matrona desde hai meses e tamén un pediatra desde hai máis dun mes”.
Sinalaron ademais que en Aguiño “o servizo médico só se presta durante algunhas horas cando deberían estar traballando dous profesionais de maneira estábel”.
O ex-alcalde e portavoz do BNG, Luís Pérez Barral, denunciou que esta situación “evidencia o abandono que sofre a sanidade pública no noso concello”, e asegurou que a formación nacionalista “seguirá ao lado da veciñanza ata conseguir todos os profesionais necesarios para garantir unha atención sanitaria digna, sen tempos de agarda excesivos porque mentres están deteriorando o servizo público, por outro lado vemos como a Xunta transfire cartos á privada, concretamente 1.600 millóns entre 2020 e 2025 que poderían ter ido para o sistema público de saúde”.
Barral dixo tamén que a alcaldesa “nunca defendeu os dereitos da veciñanza nin apoiou as súas reivindicacións, porque prefiren defender os intereses do Partido Popular antes que as necesidades da veciñanza”.
Desde o BNG reiteran que “continuarán impulsando iniciativas e reclamacións institucionais ata que a Xunta cubra todas as prazas vacantes e se restableza un servizo sanitario completo e de calidade para Ribeira e Aguiño”.
