O alumnado participante no Programa Integrado de Emprego 2025/2026 impulsado polos Concellos de Boiro, Rianxo e A Pobra rematou a formación en peixaría e charcutaría.
Na formación de charcutaría participaron 15 alumnos e alumnas que recibiron formación en técnicas de manipulación, corte de pezas, presentación para a comercialización e técnicas de procesado e conservación.
Durante 15 horas formativas adquiriron os coñecementos propios para o emprego de maquinaria de cortafriames, manipulación de produto e seguridade e hixiene alimentaria.
No curso de preparación de peixes e mariscos participaron 14 persoas que recibiron formación en técnicas para a manipulación, corte e preparación de produtos pesqueiros.
Durante 40 horas formativas adquiriron coñecementos fundamentais na selección de peixes frescos, técnicas de despece e fileteado, así como na identificación da calidade e da frescura, e tamén nos estándares de calidade alimentaria.
O Programa Integrado de Emprego do Concello de Boiro 2025/2026 realízase en colaboración cos concellos de Rianxo e A Pobra e está subvencionado pola Consellería de Emprego, Comercio e Emigración da Xunta de Galicia e o Servizo Público de Emprego Estatal.
Participan nesta formación 100 persoas desempregadas da comarca que, durante 12 meses, reciben formación específica acorde aos sectores produtivos da zona así como xornadas destinadas á mellora das habilidades de empregabilidade e inserción laboral.
Segundo informou o Concello de Boiro, “este programa basease nunha metodoloxía innovadora onde as persoas usuarias son protagonistas da súa propia transición profesional con formación innovadora, emprego de tecnoloxías e plataformas dixitais, colaboración directa con empresas e adaptación do programa a necesidades locais e sectores da comarca”.
