O Concello de Noia está a executar na Albariza unha nova actuación de saneamento e abastecemento de auga, que permitirá dotar ao núcleo dunha rede de saneamento pluvial e fecal moderna e eficiente. Esta infraestrutura quedará conectada a unha fosa séptica común dimensionada para o dobre da poboación actual, garantindo capacidade e servizo tamén de cara ao futuro.
Ao mesmo tempo, o Executivo está a realizar a conexión coa rede de abastecemento de auga ao longo da estrada autonómica AC-311, “completando unha intervención clave para mellorar a calidade de vida da veciñanza”, explicou o Concello, engadindo que as obras inclúen tamén a pavimentación con aglomerado, dentro do Plan Camiña Rural.
Dende o Consistorio indican que un dos aspectos máis destacados desta actuación é que se está a levar a cabo con medios propios do Concello, “o que supón un aforro aproximado de 60.000 euros respecto doutros sistemas de execución”.
