Tres asociacións: a ecoloxista ADEGA, a veciñal e ambiental de Meirama e a de veciñas e veciños das Encrobas, presentaron alegacións ao proxecto de central de bombeo na balsa mineira de Meirama. Este proxecto está promovido pola empresa COVENTINA RENOVABLES, S. L. e foi declarado estratéxico pola Xunta de Galicia.
Trátase da construción dunha central enerxética que empregaría como depósito inferior a balsa mineira de Meirama, cuxa auga desemboca no encoro de Abegondo que, amáis de ser un espazo natural protexido que forma parte da Rede Natura 2000 ES1110005, subministra auga potábel á cidade da Coruña e a súa área metropolitana. Este tipo de instalación non pode situarse a ceo aberto e a de Meirama é, como queda dito, unha balsa mineira, non unha lagoa natural. A súa auga ten determinadas características que a fan dificilmente compatíbel con ser empregada para consumo humano. Ven ser auga de alta acidificación dunha importante cantidade de metais pesados (manganeso, ferro, aluminio e mesmo arsénico e uranio) aaáis dunha baixa concentración de osíxeno.
O funcionamento desta central sería posible bombeando e soltando grandes volumes de auga constantemente. Tal movemento masivo podería remover estes metais pesados desde a balsa mineira ata o río Barcés e, finalmente, ata o encoro de Cecebre. Así poñeríase en risco a calidade da auga (que é excelente) que bebemos centos de milleiros de persoas. O estado do proxecto pasa completamente por alto este perigo.
O desenvolvemento deste proxecto suporía a desaparición dunha zona na que existen espazos naturais como As Brañas de Torreiro e O Rego de Biduído que, malia non estaren inventariados, manteñen importantes valores naturais, polo que o proxecto podería incidir negativamente no mesmo e repercutindo na desaparición destas zonas naturais.
