O Concello de Boiro prosegue coas obras das novas instalacións do Club de Remo de Cabo de Cruz, uns traballos dos que dimos conta en marzo (salientando a continuidade da construción malia o parón produtivo motivado pola COVID-19) e que agora dan un novo paso co redeseño do foso previsto para práctica deportiva no inverno. Esta reelaboración foi decidida esta semana durante a xuntanza mantida entre o alcalde, José Ramón Romero, o concelleiro de Obras, Luís Ruíz, o concelleiro de Deportes, Marcos Fajardo, os responsábeis do Club de Remo Cabo de Cruz e os técnicos responsables do proxecto.
Para a toma da decisión tivéronse en conta, pola miúdo, as contribucións dos responsábeis e técnicos do club, así como as recomendacións do Centro de Tecnificación Deportiva de Zaragoza en canto ao remo. O novo deseño tamén se inspira no fosos das instalacións de traíñas en Euskadi, e nas experiencias doutras instalacións existentes na comarca. Incidiuse especialmente na “ergonomía das propias traíñas” e “na posición óptima para o rendemento dos remeiros na competición”, explicaron.
Unha vez realizado o novo deseño, a partir desta semana vaise proceder á construción deste novo foso de remo, que vai ocupar 141 metros cadrados da nova instalación, cun ancho de 9 metros e unha lonxitude total de 15,50 metros. A infraestrutura vai dispoñer de sistemas específicos de circulación e impulsión de auga que permiten simular condicións reais en competición, e un deseño específico de bancadas e toletes que se axustan ás condicións reais da traíña.
Coa colaboración dos responsábeis do Club de Remo e as modificacións realizadas polos técnicos responsables da obra, “contarase cunha instalación moderna e de primeiro nivel en Galicia, á altura dos clubs nacionais que participan nas competicións de traíñas”, explicaron dende o Concello.
