A AC Fouleada e o Concello de Muros compartiron o programa de actividades que se vai desenvolver este luns 5 de xaneiro no concello muradá para recibir e acompañar ás Súas Maxestades os Reis Magos de Oriente.
Pola mañá, a comitiva do Carteiro Real percorrerá por última vez a vila para recoller as cartas aínda pendentes.
As 12h, o Carteiro Real recibirá a todas as crianzas e maiores que queiran entregar as súas cartas, no Cine París.
A partir das 15:00h, todas aquelas persoas que queiran acompañar aos Reis Magos, formando parte da súa “espectacular Cabalgata”, poden achegarse á Escola de San Xosé.
As 17.30h, partirá a espectacular comitiva real desde Laxeiras ata o Curro da Praza.
Estará habilitada unha zona silenciosa para persoas neurodiverxentes. “Para aquelas persoas con necesidades sensoriais, ou que prefiran desfrutar do desfile sen ruído, habilitarase un treito sen música, que irá desde o IES Fontexería ata a rotonda da Tremenda”, informaron dende a asociación e o Concello, recomendando ás familias que se sitúen no entorno do Colexio Ramón de Artaza ou na zona de enfronte, no cruce que baixa para o Cachón.
