O Bloque Nacionalista Galego vén de presentar a campaña “Mellor local, mellor galego”, unha iniciativa coa que pretende animar á cidadanía a mercar nas tendas de proximidade, consideradas unha peza clave para manter vivas as vilas e fortalecer a economía local en Galiza.
A campaña, xa coñecida entre os comerciantes nestas datas sinaladas —coincidentes co período de maior consumo do ano—, busca facer fronte ao modelo das macroempresas que concentran os beneficios mentres debilitan o tecido económico e social. Fronte a esta realidade, o BNG aposta por un novo modelo comercial para Galiza, afastado do impulsado polo Partido Popular, que —segundo denuncia a formación— favorece ás grandes superficies en detrimento do sector primario, da industria de transformación e do comercio de proximidade.
“Cada compra no comercio local é unha aposta polo futuro de Galiza, pola sustentabilidade e por un modelo económico máis xusto e equilibrado”, sinalou o responsable comarcal do BNG, Francisco Rei, quen confía en que esta campaña contribúa a tomar conciencia da necesidade de contar cun tecido comercial forte que encha de vida as vilas e barrios.
Rei advertiu tamén da importancia de apostar polo consumo de produtos de proximidade como ferramenta para xerar emprego, dinamizar a vida social e económica e garantir que a riqueza producida no país quede en Galiza.
Baixo o lema “Aposta polo noso, sairás gañando”, a campaña incide na calidade dos produtos e produtores locais e galegos, promove alternativas ecolóxicas e reclama a posta en marcha de axudas que permitan implantar e mellorar establecementos dedicados á comercialización de produtos autóctonos.
Desde o BNG subliñan que o comercio local “non é o pasado, é o presente e o futuro do noso país”, e defenden que apostar polo comercio de proximidade é apostar por Galiza.
