A Deputación da Coruña anunciou este martes 5 de maio que, co obxectivo de seguir botando unha man nestes tempos de crise sanitaria, ampliará en dous meses o período voluntario de pago do imposto de vehículos (o IVTM), que irá dende este 4 de maio até o 1 de setembro, co que se amplía en dous meses con respecto aos prazos habituais. Este adiamento, que ten o obxectivo de facilitar á cidadanía o cumprimento das súas obrigas tributarias, atinxirá a 79 concellos da provincia.
O envío de recibos para o pago comezará unha vez levantado o confinamento e o cargo en conta dos recibos domiciliados farase o 31 de xullo.
Para calquera dúbida, a Deputación mantén aberto o Servizo de Atención ao Contribuínte a través do teléfono gratuíto 900 132 204 e do correo atencion.tributaria@dacoruna.gal, así como a Oficina Virtual Tributaria na que se poden realizar trámites, consultas e xestións as 24 horas do día, os 365 días do ano. Tamén pode solicitarse atención presencial mediante cita previa, que deberá solicitarse por vía telefónica, por correo electrónico ou na web da Deputación.
