A conselleira do Mar, Marta Villaverde, participou este domingo na VIII edición das Xornadas de Exaltación do Berberecho de Noia, unha iniciativa organizada pola confraría de pescadores San Bartolomé que pon en valor un dos produtos máis recoñecidos da ría e un piar fundamental para a economía local.
O evento converteuse nun auténtico escaparate deste molusco, apreciado pola súa calidade excepcional, o seu tamaño e o seu sabor singular, resultado dunhas condicións naturais únicas e dunha xestión sostible do banco marisqueiro. A cita reuniu a profesionais do mar, restauradores, produtores e visitantes arredor dun produto que representa a identidade mariñeira da comarca.
Durante a súa intervención, Villaverde felicitou aos promotores das xornadas, ás que definiu como “unha oportunidade única para poñer en valor o traballo dos mariscadores, reforzar a identidade desta comarca e visibilizar toda a actividade económica vinculada ao mar”.
Así mesmo, destacou o carácter solidario do evento, xa que os fondos recadados destinaranse a entidades sen ánimo de lucro como Cáritas e Cruz Vermella.
