A Consellería do Mar presentou ao sector da pesca recreativa as ferramentas tecnolóxicas de xestión de licenzas nunha xuntanza cos representantes das entidades vinculadas á pesca marítima de recreo dirixida tamén a analizar as novidades que introduce a normativa comunitaria e nacional e que afectan directamente ás persoas afeccionadas a esta actividade.
Durante a reunión, o director xeral de Pesca, Acuicultura e Innovación Tecnolóxica, Cándido Rial, explicou que a Unión Europea obriga a que todos os Estados membros dispoñan dun sistema electrónico de rexistro e comunicación das capturas da pesca recreativa, requisito que será de aplicación a partir do 10 de xaneiro de 2026.
Destacou tamén que Galicia xa conta cun sistema plenamente operativo para a xestión das licenzas, a través do portal e da aplicación móbil desenvolvidos pola Axencia para a Modernización Tecnolóxica de Galicia (AMTEGA). Este sistema, explicou a Xunta, “permite rexistrar automaticamente as licenzas expedidas e renovadas tanto para persoas físicas como para embarcacións, convertendo a Galicia nunha das primeiras comunidades autónomas en dispoñer dun Rexistro de Pesca Recreativa plenamente actualizado”.
Así mesmo, recordouse que os datos das licenzas transmítense diariamente ao Ministerio de Agricultura, Pesca e Alimentación, en cumprimento dos criterios de interoperabilidade acordados entre administracións.
A partir de xaneiro de 2026, todas as persoas que practiquen pesca recreativa (e que terán que contar coa licenza correspondente) deberán declarar electronicamente as capturas realizadas, para o que o Ministerio porá a disposición unha nova aplicación móbil común para todas as comunidades autónomas. En paralelo, a Xunta adaptará o seu portal e aplicación actuais para facilitar unha experiencia máis sinxela para os usuarios, reducindo trámites e integrando toda a información necesaria nun único punto de acceso.
A Xunta lembrou que a tramitación das licenzas realízase a través do Sistema Integrado de Pesca Marítima de Recreo (SIPMAR), que permite obter ou renovar licenzas, solicitar autorizacións complementarias (mergullo, concursos ou campionatos), conservar a licenza no móbil a través da aplicaicón XuntaEU, e realizar todas as xestións de maneira 100 % electrónica ou presencialmente a través das entidades financeiras colaboradoras. O sistema integra tamén información co Servizo de Gardacostas, coa Plataforma Tecnolóxica da Pesca e con outras ferramentas que a Xunta pon ao servizo dos sectores pesqueiros e marisqueiros para mellorar a xestión e a rastrexabilidade.
A Consellería de Mar lembrou que a pesca marítima de recreo ten “un peso social moi destacado en Galicia”, con 81.103 licenzas tramitadas en 2025, 78.075 de superficie, 3.018 de submarina e 10 correspondentes á 6ª lista. A maioría destas xestións realizáronse a través das entidades financeiras colaboradoras (64.634), mentres que 14.303 foron tramitadas pola sede electrónica.
“Esta dimensión converte a Galicia nunha das comunidades con maior actividade recreativa pesqueira do Estado e subliña a necesidade dun sistema dixital interoperábel que facilite a planificación, o control e a sustentabilidade desta modalidade”, engadiu a Xunta.
As ferramentas presentadas forman parte da estratexia global de transformación dixital impulsada pola Consellería do Mar e a Axencia para a Modernización Tecnolóxica de Galicia, que inclúe proxectos como Lonxas Galegas 4.0, AXUMAR ou MOVTIC, entre outros, orientados a mellorar a eficiencia, a transparencia e a competitividade do sector.
