No Auditorio de Rianxo podemos visitar estes días unha exposición fotográfica que homenaxea á xente do noso mar: a mostra aMar de Lorena do Merlo. Inclúe unha escolma de 40 imaxes na que a autora rende unha homenaxe visual á dignidade do traballo no mar, á beleza dura da rutina e á forza da colectividade mariñeira. A exposición, que forma parte da programación da VIII Mostra Internacional de Cinema Documental (Mares da Fin do Mundo) que este ano se celebrará en Rianxo, poderase visitar ata o 14 de decembro.
Lorena do Merlo, fotógrafa de Boqueixón afincada no Barbanza (en Aguiera, Porto do Son), incluíu nesta exposición un conxunto moi destacado de imaxes en branco e negro e en cor, realizadas cunha cámara Canon Mark IV e unha Canon R6, que recollen con diferentes ópticas o mundo da pesca e o lado humano que hai detrás dos profesionais que protagonizan a actividade pesqueira do municipio.
Festival Mares da Fin do Mundo
A exhibición fotográfica de Lorena do Merlo encádrase (a xeito de antesala) na celebración da oitava edición da Mostra Internacional de Cinema Documental Mares da Fin do Mundo, que este ano desenvólvese en Rianxo logo do seu paso por Ribeira e, previamente, por Outes.
A Mostra celebrarase entre os días 10 e 14 de decembro no Concello de Rianxo. Un total de trinta e cinco filmes nacionais e internacionais repartiranse nas distintas seccións previstas nesta edición. Ademais, a programación complementaranse con actividades paralelas que se desenvolverán en diversas localizacións do municipio.
Quen precise máis información tena na páxina web da Mostra.
