Este luns alerta laranxa en Galicia por temporal costeiro con ondas de ata sete metros. O temporal obriga a suspender actividades deportivas no mar este luns en Galicia
Galicia iniciará a semana baixo unha situación meteorolóxica marcada pola influencia combinada das altas presións ao sueste da Península e das borrascas situadas sobre as Illas Británicas, o que favorecerá unha circulación intensa de ventos do sur-suroeste durante toda a xornada do luns 8, festa da Inmaculada Concepción.
Espérase unha xornada de ceos nubrados, especialmente no litoral e nas comarcas occidentais, onde se concentrará a maior carga de nubes e onde se prevén chuvias febles, principalmente nas primeiras horas do día. No resto do territorio, o ambiente será gris pero sen precipitacións significativas.
As temperaturas manteranse sen cambios, con valores similares aos rexistrados nas últimas xornadas, tanto nas máximas como nas mínimas.
O vento será o protagonista da xornada: soprará do sur con intensidade forte, rexistrándose refachos moi fortes nas zonas máis expostas, tanto na costa como en áreas elevadas do interior.
As autoridades recomendan precaución en espazos abertos, zonas costeiras e estradas ante posibles incidencias derivadas das fortes rachadas de vento.
O noso mar: Vento do sur á mañá e á tarde e do sur á noite, forza 6 a 8 á mañá e á tarde e 7 a 8 á noite. Media vaga á mañá e á tarde e vaga á noite. Visibilidade regular. Mar de fondo do oeste, con ondas de 4 a 5 metros á mañá e á tarde e 3 a 4 metros á noite.
