O Concello de Boiro vén de adquirir un vehículo 100% eléctrico, carrozado como recolector de residuos. A adquisición deste vehículo realizouse ao abeiro das axudas en materia de residuos de competencia municipal para a implantación de recollidas separadas.
Dende o Goberno local explicaron que estamos ante un vehículo 100% eléctrico carrozado como recolector RSU de carga traseira non compactador para bioresiduos de nova fabricación, adaptado á estrutura urbana das rúas e puntos de recollida do municipio.
Xunto coa adquisición deste vehículo, levouse a cabo unha campaña de concienciación sobre a implantación do quinto contedor. As dúas accións desenvolvéronse mediante o financiamento da Consellería de Medio Ambiente e Cambio Climático a través das axudas encamiñadas a levar a cabo actuacións en materia de residuos de competencia municipal, co-financiadas polo fondo europeo relativo ao Mecanismo de recuperación e resiliencia da UE no marco do Plan de recuperación, transformación e resiliencia, financiado pola Unión Europea-NextGenerationEU.
O Concello de Boiro está a traballar na implantación do contedor marrón con diversas accións como a adquisición deste vehículo. No mes de outubro levouse a cabo unha campaña informativa e de concienciación e no mes de novembro instaláronse os primeiros contedores marróns para os grandes produtores. Deste xeito o que se busca “é que a implantación do contedor de residuos orgánicos sexa progresiva e concienciar á veciñanza sobre boas prácticas de reciclaxe”, explicou o Concello.
